ફ્લાય દુબઈની 30 સપ્ટેમ્બરની દુબઈથી ઈઝરાયેલ જતી ફ્લાઇટમાં સહપાયલોટ દ્વારા સિનિયર પાયલોટ કેપ્ટન સ્મિત મચ્છર પર ઇમરજન્સી માટે રાખવામાં આવેલી કુહાડીથી હુમલો કરવામાં આવ્યો હોવાની ઘટના બાદ ભારત પણ એલર્ટ થયું છે. આ ઘટનાને પગલે દેશમાં આવી પરિસ્થિતિનો સામનો કરવા માટે સુરક્ષા વ્યવસ્થાની આંતરિક સમીક્ષા કરવામાં આવી રહી છે.
સૂત્રોના જણાવ્યા અનુસાર, સમીક્ષામાં ભારતમાં આવતી-જતી વિદેશી એરલાઇન્સના પાયલોટ, એર હોસ્ટેસ સહિતના ક્રૂ મેમ્બર્સની પૃષ્ઠભૂમિની તપાસના મુદ્દાઓનો સમાવેશ થઈ શકે છે. ખાસ કરીને વિદેશી એરલાઇન્સના ક્રૂ મેમ્બર્સ કયા દેશના નાગરિક છે અને આંતરરાષ્ટ્રીય ફ્લાઇટ્સના કોકપીટ ક્રૂમાં પાકિસ્તાની નાગરિકોની હાજરી છે કે નહીં, તે અંગેની માહિતી એકત્રિત કરવાના પાસાઓ પર પણ વિચાર થઈ શકે છે.
સૂત્રોના જણાવ્યા અનુસાર, આ ઘટનાએ ભારત આવતાં-જતાં વિદેશી નાગરિકોના રેકોર્ડ અને ઉડ્ડયન ક્ષેત્રની સુરક્ષા વ્યવસ્થાને વધુ મજબૂત બનાવવાની જરૂરિયાત તરફ ધ્યાન દોર્યું છે. ઘટનામાં આરોપી સહપાયલોટ હમામ અલ હમામી અલકાયદાથી પ્રભાવિત હોવાની આશંકા પણ વ્યક્ત કરવામાં આવી છે.
ઈઝરાયેલ સહિત અન્ય દેશોની તપાસ એજન્સીઓ એ દિશામાં તપાસ કરી રહી છે કે હુમલો કોઈ વ્યક્તિની અંગત કાર્યવાહી હતો કે તેની પાછળ અલકાયદા અથવા અન્ય કોઈ આતંકવાદી સંગઠનની ભૂમિકા હતી. આ ઉપરાંત, વિમાનને દુર્ઘટનાગ્રસ્ત કરવાનો કોઈ ષડયંત્ર રચવામાં આવ્યો હતો કે કેમ, તે અંગે પણ તપાસ કરવામાં આવી રહી છે.
આ ઘટનાએ ઉડ્ડયન ક્ષેત્રમાં સુરક્ષાના નવા પડકારો ઊભા કર્યા છે. પાયલોટ ઉપરાંત કોકપીટ સુધી પહોંચ ધરાવતા એર હોસ્ટેસ અને અન્ય ક્રૂ મેમ્બર્સની સુરક્ષા ચકાસણી પર પણ વિશેષ ધ્યાન આપવાની જરૂરિયાત સામે આવી છે.
કોકપીટમાં રાખવામાં આવતી કુહાડી અંગે પણ વિચારણા: વિમાનના કોકપીટમાં ઇમરજન્સી પરિસ્થિતિ માટે રાખવામાં આવતી કુહાડીનો ઉપયોગ હુમલા માટે થયો હોવાના અહેવાલને પગલે તેના ઉપયોગ અને સુરક્ષા વ્યવસ્થા અંગે પણ સવાલો ઊભા થયા છે. ભવિષ્યમાં કુહાડીને કોકપીટમાંથી દૂર કરવી કે તેની સુરક્ષા માટે અન્ય કોઈ વ્યવસ્થા કરવી, તે અંગેનો નિર્ણય આંતરરાષ્ટ્રીય ઉડ્ડયન માર્ગદર્શિકાઓ અને તપાસના તારણોના આધારે લેવામાં આવી શકે છે.
