5-ડે વર્કિંગની માંગ અને નવી PLI સ્કીમના વિરોધમાં બેંક યુનિયનોના સંયુક્ત મોરચા UFBU દ્વારા આજે એક દિવસની દેશવ્યાપી હડતાળનું આહ્વાન કરવામાં આવ્યું છે. તેના કારણે SBI, PNB, યુનિયન બેંક સહિત અનેક સરકારી બેંકોની શાખાકીય કામગીરી ખોરવાઈ છે અને ગ્રાહકોને મુશ્કેલીનો સામનો કરવો પડી રહ્યો છે.
હડતાળ બાદ 12 સપ્ટેમ્બરે મહિનાનો બીજો શનિવાર અને 13 સપ્ટેમ્બરે રવિવાર હોવાથી બેંકો સતત ત્રણ દિવસ બંધ રહેશે. જોકે UPI, મોબાઇલ બેંકિંગ અને ATM જેવી ડિજિટલ સેવાઓ સામાન્ય રીતે ચાલુ રહેવાની શક્યતા છે.
બેંક યુનિયનો છેલ્લા બે વર્ષથી 5-ડે બેંકિંગની માંગ કરી રહ્યા છે. હાલ દર મહિનાના બીજા અને ચોથા શનિવારે બેંકોમાં રજા હોય છે, જ્યારે નવા પ્રસ્તાવ મુજબ તમામ શનિવારે રજા રાખવાની માંગ છે. તેના બદલામાં સોમવારથી શુક્રવાર સુધી દૈનિક કામકાજનો સમય 40 મિનિટ વધારવાનો પ્રસ્તાવ છે.
8 માર્ચ 2024ના IBA અને બેંક યુનિયનો વચ્ચેના કરાર બાદ આ પ્રસ્તાવ નાણા મંત્રાલયને મોકલાયો હતો, પરંતુ હજુ સુધી કેન્દ્ર સરકારની મંજૂરી મળી નથી.
આ ઉપરાંત યુનિયનો નવી પરફોર્મન્સ લિંક્ડ ઇન્સેન્ટિવ (PLI) સ્કીમનો પણ વિરોધ કરી રહ્યા છે. યુનિયનોના જણાવ્યા મુજબ, સ્કેલ IV અને તેનાથી ઉપરના અધિકારીઓને વ્યક્તિગત કામગીરીના આધારે 365 દિવસ સુધીના બેસિક પે જેટલું PLI મળી શકે છે, જ્યારે સ્કેલ Iથી IIIના કર્મચારીઓ માટે મહત્તમ 15 દિવસના બેસિક પે અને DAની જોગવાઈ છે.
યુનિયનોએ ચેતવણી આપી છે કે સરકાર તેમની માંગણીઓનો ઉકેલ નહીં લાવે તો 26 ઓક્ટોબરથી અનિશ્ચિત મુદતની હડતાળ શરૂ કરવામાં આવી શકે છે.
