તહેવારોની સિઝનમાં ભાવવધારાનું જોખમ વધ્યું; LPG સિલિન્ડર દીઠ પણ રૂ.200ની અન્ડર-રિકવરી
નવી દિલ્હી: આંતરરાષ્ટ્રીય બજારમાં ક્રૂડ ઓઈલના ભાવમાં સતત થઈ રહેલા વધારાને કારણે ભારતની ઓઈલ માર્કેટિંગ કંપનીઓ પર દબાણ વધ્યું છે. ક્રૂડના ભાવ 100 ડોલર પ્રતિ બેરલને પાર પહોંચતા હવે દેશમાં પેટ્રોલ અને ડીઝલના ભાવ વધારાની શક્યતા અંગે ચિંતા વધી છે. ખાસ કરીને તહેવારોની સિઝનમાં ઈંધણના ભાવમાં વધારો થાય તો સામાન્ય ગ્રાહકો પર સીધી અસર પડી શકે છે.
પેટ્રોલ-ડીઝલમાં અન્ડર-રિકવરી
સપ્ટેમ્બર મહિનાના સરેરાશ ક્રૂડ ભાવને ધ્યાનમાં લેવામાં આવે તો પેટ્રોલના વેચાણમાં ઓઈલ કંપનીઓને લગભગ રૂ.5 પ્રતિ લીટર, જ્યારે ડીઝલમાં રૂ.23 પ્રતિ લીટર જેટલી અન્ડર-રિકવરી થઈ રહી હોવાનું જણાવાયું છે. લાંબા સમય સુધી આંતરરાષ્ટ્રીય ભાવ ઊંચા રહે તો કંપનીઓના માર્જિન પર વધુ દબાણ આવી શકે છે.
LPGમાં પણ રૂ.200ની ખોટ
પેટ્રોલ-ડીઝલ ઉપરાંત ઘરેલુ ઉપયોગના 14.5 કિલોના LPG સિલિન્ડર પર પણ આશરે રૂ.200 પ્રતિ સિલિન્ડરની અન્ડર-રિકવરી ચાલી રહી છે. આંતરરાષ્ટ્રીય નિષ્ણાતોના મતે નવેમ્બર અંત સુધીમાં ક્રૂડ ઓઈલના ભાવમાં નોંધપાત્ર ઘટાડો થવાની શક્યતા ઓછી છે.
ભારતનું આયાત બિલ 56.5% વધ્યું
ક્રૂડ ઓઈલના ઊંચા ભાવની સીધી અસર ભારતના આયાત બિલ પર પણ પડી રહી છે. એપ્રિલથી જુલાઈ દરમિયાન દેશનું ક્રૂડ ઓઈલ આયાત બિલ 56.5 ટકા વધીને 63.4 બિલિયન ડોલર થયું છે.
ભારત પોતાની ક્રૂડ ઓઈલની જરૂરિયાતના આશરે 90 ટકા જેટલું તેલ આયાત કરે છે. બીજી તરફ, દેશની ગેસની જરૂરિયાતનો આશરે 50 ટકા હિસ્સો પણ વિદેશમાંથી આયાત કરવામાં આવે છે.
સપ્લાય ચેઈન પણ પડકારરૂપ
આંતરરાષ્ટ્રીય બજારમાં ઊંચા ભાવ ઉપરાંત સપ્લાય ચેઈનની અનિશ્ચિતતા પણ પડકાર બની રહી છે. વૈશ્વિક પુરવઠા વ્યવસ્થા સામાન્ય સ્થિતિમાં પરત ફરવામાં સમય લાગી શકે છે. આવી સ્થિતિમાં ક્રૂડ ઓઈલના ભાવ ઊંચા જળવાઈ રહે તો ભારતમાં પેટ્રોલ-ડીઝલ તથા LPGના ભાવ અંગે આગામી સમયમાં વધુ દબાણ સર્જાઈ શકે છે.
