અમેરિકાના રાષ્ટ્રપતિ ડોનાલ્ડ ટ્રમ્પે મોટો દાવો કરતાં કહ્યું છે કે ચીનના રાષ્ટ્રપતિ શી જિનપિંગ આગામી બે અઠવાડિયામાં અમેરિકાની મુલાકાતે આવી શકે છે. જોકે, ટ્રમ્પના આ નિવેદન બાદ ચીન સરકાર અથવા વ્હાઇટ હાઉસ તરફથી હજુ સુધી મુલાકાતની ચોક્કસ તારીખ અને સત્તાવાર કાર્યક્રમની પુષ્ટિ કરવામાં આવી નથી.
ટ્રમ્પે સોમવારે વ્હાઇટ હાઉસના રોઝ ગાર્ડનમાં યોજાયેલા કાર્યક્રમ દરમિયાન શી જિનપિંગની સંભવિત મુલાકાતનો ઉલ્લેખ કર્યો હતો. આ દરમિયાન તેમણે વ્હાઇટ હાઉસ પરિસરમાં ચાલી રહેલા બાંધકામ અંગે માહિતી આપતાં ચીનના ‘ગ્રેટ હોલ ઑફ ધ પીપલ’ સાથે તેની સરખામણી કરી હતી.
વ્હાઇટ હાઉસમાં ભવ્ય સભાખંડ અને સૈન્ય સંકુલનું નિર્માણ
ટ્રમ્પના જણાવ્યા અનુસાર વ્હાઇટ હાઉસ પરિસરમાં વિશાળ સભાખંડ સાથે સૈન્ય સંકુલ પણ બનાવવામાં આવી રહ્યું છે. તેમણે દાવો કર્યો કે આ નવી ઇમારત વિશ્વમાં પોતાની રીતે શ્રેષ્ઠ હશે.
આ ઉપરાંત વ્હાઇટ હાઉસમાં નવા હેલિપેડનું પણ નિર્માણ થઈ રહ્યું છે. ટ્રમ્પે કહ્યું કે અગાઉ હેલિકોપ્ટરને ભીની ઘાસ પર ઉતારવાની ફરજ પડતી હતી, જે સુરક્ષાની દૃષ્ટિએ યોગ્ય નહોતું. નવા હેલિપેડની જરૂરિયાત ઘણા સમયથી હતી અને હવે તેનું કામ હાથ ધરાયું છે.
મુલાકાત અંગે હજુ સત્તાવાર વિગતો જાહેર નથી
ટ્રમ્પે શી જિનપિંગની બે અઠવાડિયામાં અમેરિકાની મુલાકાતની જાહેરાત કરી હોવા છતાં ચીન તરફથી હજુ કોઈ સત્તાવાર નિવેદન આવ્યું નથી. વ્હાઇટ હાઉસે પણ મુલાકાતની તારીખ અથવા બંને નેતાઓ વચ્ચેની બેઠકના એજન્ડા અંગે વિગતો જાહેર કરી નથી.
જો આ મુલાકાત યોજાય છે તો વેપાર, ટેકનોલોજી, તાઇવાન અને અમેરિકા-ચીન વચ્ચેની વ્યૂહાત્મક સ્પર્ધા જેવા મુદ્દાઓ પર ચર્ચા થવાની સંભાવના છે. બંને દેશો વચ્ચે લાંબા સમયથી તણાવપૂર્ણ સંબંધો રહ્યા છે, પરંતુ ઉચ્ચ સ્તરે સંવાદ જાળવી રાખવાના પ્રયાસો પણ થઈ રહ્યા છે.
‘ગ્રેટ હોલ ઑફ ધ પીપલ’ જેવી ઇમારતની ચર્ચા
બીજિંગનું ‘ગ્રેટ હોલ ઑફ ધ પીપલ’ ચીનની મહત્વપૂર્ણ ઔપચારિક અને વિધાનસભા સંબંધિત ઇમારત છે. અહીં મોટા સરકારી કાર્યક્રમો, વિદેશી નેતાઓના સ્વાગત સમારોહ અને નેશનલ પિપલ્સ કોંગ્રેસની બેઠકો યોજાય છે.
ટ્રમ્પે વ્હાઇટ હાઉસ પરિસરમાં બની રહેલા નવા સભાખંડની સરખામણી આ ભવ્ય ઇમારત સાથે કરતાં તેને અમેરિકાના વહીવટી સંકુલમાં મહત્વપૂર્ણ ઉમેરો ગણાવ્યો છે.
