બોલબાલા માર્ગ પરથી દારૂ ભરેલી બલેનો ઝડપાઈ : બે બુટલેગર સહિત 6 શખ્સોની ધરપકડ
રાજકોટ શહેરમાં દારૂ-જુગારની ગેરકાયદે પ્રવૃત્તિઓ સામે પોલીસે કાર્યવાહી વધુ તેજ કરી છે. PCBની ટીમે બોલબાલા માર્ગ પરથી દારૂ ભરેલી બલેનો કાર ઝડપી પાડી બે શખ્સોની ધરપકડ કરી છે. જ્યારે શહેરના અન્ય વિસ્તારોમાં પોલીસે દારૂ સાથે વધુ ચાર શખ્સોને ઝડપી લીધા છે.
પોલીસ કમિશનર બ્રજેશકુમાર ઝાની સૂચનાથી PCB PI એમ.આર. ગોંડલિયાની રાહબરી હેઠળ ટીમ પેટ્રોલિંગમાં હતી. દરમિયાન હેડ કોન્સ્ટેબલ ઉમેશભાઈ ચાવડા, દિલીપભાઈ બોરીચા અને કોન્સ્ટેબલ વિશાલભાઈ દવેને મળેલી બાતમીના આધારે બોલબાલા માર્ગ પર વોચ ગોઠવવામાં આવી હતી.
દરમિયાન દારૂ ભરેલી બલેનો કાર ઝડપાઈ હતી. પોલીસે ફારુક ઉર્ફે ફારકોં મજીદ સાંજી (ઉ.વ.35) અને **જયસુખ કેશુ મકવાણા (ઉ.વ.26)**ને ઝડપી લીધા હતા. બંને પાસેથી અલગ-અલગ બ્રાન્ડની 36 દારૂની બોટલ, બલેનો કાર અને મોબાઈલ સહિત કુલ રૂ.5 લાખનો મુદ્દામાલ કબજે કરવામાં આવ્યો હતો.
અન્ય દરોડામાં પણ ચાર શખ્સ ઝડપાયા
B ડિવિઝન પોલીસે દારૂની 4 બોટલ સાથે નિલેશ પ્રવીણ રામાવતની ધરપકડ કરી હતી.
માલવિયાનગર પોલીસે બાલાજી હોલ નજીકથી 26 દારૂની બોટલ સાથે રાહુલ મુળજી ધમ્મરને ઝડપી લીધો હતો. તેમજ આનંદ બંગલા ચોક નજીકથી અજય અશોક વાળાની દારૂના જથ્થા સાથે ધરપકડ કરવામાં આવી હતી.
બીજી તરફ નાના મવા મેઈન રોડ પર નહેરુનગર પ્રાઇવેટ માલધારી ચોક પાસેથી ઉત્સવ તુષાર રાજકોટિયાને પણ દારૂના જથ્થા સાથે ઝડપી લેવામાં આવ્યો હતો.
પોલીસે તમામ આરોપીઓ સામે પ્રોહિબિશન હેઠળ ગુનો નોંધી દારૂના જથ્થા સહિતનો મુદ્દામાલ કબજે કરી વધુ તપાસ હાથ ધરી છે.
