સંસ્થાકીય રોકાણકારોએ ઓફરને 3.32 ગણું સબ્સ્ક્રાઇબ કરી; IPO બાદ સરકારનું પ્રથમ મોટું હિસ્સા વેચાણ
નવી દિલ્હી: કેન્દ્ર સરકારે LICમાં પોતાનો 6.5 ટકા હિસ્સો વેચીને અંદાજે રૂ.31,500 કરોડ એકત્ર કર્યા છે. આ સમગ્ર ડીલની માહિતી અંતિમ સમય સુધી ગુપ્ત રાખવામાં આવી હતી.
સોદા માટે નિયુક્ત ચાર ઈન્વેસ્ટમેન્ટ બેંકર્સને પણ ટ્રાન્ઝેક્શન શરૂ થવાના થોડા કલાકો પહેલાં જ જાણ કરવામાં આવી હતી. સરકારનો મુખ્ય હેતુ બજારમાં અગાઉથી માહિતી લીક ન થાય અને LICના શેરના ભાવ પર સટ્ટાકીય દબાણ ન આવે તે હતો.
સરકારે શરૂઆતમાં 2.5 ટકા હિસ્સો વેચવાની યોજના બનાવી હતી. જોકે સંસ્થાકીય રોકાણકારો તરફથી 3.32 ગણું સબ્સ્ક્રિપ્શન મળતાં વધારાના 4 ટકાનો વિકલ્પ પણ અમલમાં મૂકવામાં આવ્યો અને કુલ 6.5 ટકા હિસ્સો વેચાયો.
આ મે 2022ના LIC IPO બાદ સરકારનું પ્રથમ મોટું હિસ્સા વેચાણ છે. વેચાણ બાદ LICમાં જાહેર શેરહોલ્ડિંગ વધીને 10 ટકા થયું છે.
આ સાથે કેન્દ્ર સરકારને મે 2027ની સમયમર્યાદા પહેલાં સેબીના લઘુત્તમ જાહેર શેરહોલ્ડિંગના નિયમનું પાલન કરવામાં પણ સફળતા મળી છે.
