છોટાઉદેપુર જિલ્લાના નસવાડી તાલુકામાં રાષ્ટ્રીય આપદા પ્રતિસાદ દળ (NDRF) દ્વારા સફળ રેસ્ક્યુ ઓપરેશન હાથ ધરવામાં આવ્યું છે. વાલપુરા ગામના ભીલ સતીશ કાંતી (ઉંમર 34 વર્ષ) જોખમી પરિસ્થિતિમાં ફસાયા હોવાની માહિતી મળતા જ NDRF ટીમ 6B તાત્કાલિક ઘટનાસ્થળે દોડી ગઈ હતી.
ઇન્સ્પેક્ટર બ્રિજેશ વિશ્વકર્માના નેતૃત્વ હેઠળ ટીમે સ્થળ પર પહોંચી પરિસ્થિતિની ગંભીરતાનો તાગ મેળવી બચાવ કામગીરી શરૂ કરી હતી. ટીમે જરૂરી સાધનો અને સાવચેતી સાથે ઓપરેશન હાથ ધરી ભીલ સતીશ કાંતીને સુરક્ષિત રીતે બહાર કાઢી સલામત સ્થળે ખસેડ્યા હતા.
સમયસર હાથ ધરાયેલી આ કામગીરીને કારણે મોટી દુર્ઘટના ટળી હોવાનું માનવામાં આવી રહ્યું છે. સ્થાનિક લોકો અને વહીવટી તંત્રએ NDRFની ટીમની ઝડપી કામગીરી અને સમર્પણની પ્રશંસા કરી હતી.
ચોમાસાની ઋતુ દરમિયાન રાજ્યના વિવિધ વિસ્તારોમાં આવી પરિસ્થિતિઓ સર્જાતી હોય છે ત્યારે NDRF જેવી વિશેષ બચાવ ટીમો સતત સતર્ક રહી નાગરિકોની સુરક્ષા માટે કામગીરી કરી રહી છે. નસવાડીમાં થયેલું આ સફળ રેસ્ક્યુ ઓપરેશન ફરી એકવાર NDRFની કાર્યક્ષમતા અને ફરજ પ્રત્યેની પ્રતિબદ્ધતાનો પુરાવો બન્યું છે.
