ભુજ નજીક આવેલા પૈયા ગામની સીમમાં પશ્ચિમ કચ્છ લોકલ ક્રાઈમ બ્રાન્ચ (LCB)એ મોટી કાર્યવાહી હાથ ધરી કથિત ગૌવંશ કતલખાનાનો પર્દાફાશ કર્યો છે. આ કાર્યવાહી દરમિયાન પોલીસે બે આરોપીઓને ઝડપી પાડ્યા છે, જ્યારે ત્રણ આરોપીઓ ઘટનાસ્થળેથી ફરાર થઈ ગયા હોવાનું સામે આવ્યું છે.
મળતી માહિતી મુજબ, પશ્ચિમ કચ્છ LCBને મળેલી બાતમીના આધારે પૈયા ગામની સીમ વિસ્તારમાં દરોડો પાડવામાં આવ્યો હતો. દરોડા દરમિયાન સ્થળ પરથી અંદાજે 100 કિલો જેટલું માંસ મળી આવ્યું હતું. ઉપરાંત, બોલેરો મેક્સી ટ્રક, ટ્રેક્ટર તેમજ કતલખાનામાં ઉપયોગમાં લેવાતા હથિયારો પણ કબજે કરવામાં આવ્યા હતા.
પોલીસે સમગ્ર કાર્યવાહી દરમિયાન કુલ ₹5.18 લાખથી વધુનો મુદ્દામાલ જપ્ત કર્યો છે. પ્રાથમિક તપાસમાં ગૌવંશની કતલ કરવામાં આવતી હોવાની શંકા વ્યક્ત કરવામાં આવી રહી છે. જોકે, જપ્ત કરાયેલા માંસના નમૂનાઓને ફોરેન્સિક તપાસ માટે મોકલવામાં આવશે, જેના આધારે વધુ સ્પષ્ટતા થઈ શકશે.
આ કેસમાં ઝડપાયેલા બે આરોપીઓની પૂછપરછ શરૂ કરવામાં આવી છે, જ્યારે ફરાર ત્રણ આરોપીઓને ઝડપી પાડવા માટે પોલીસે વિવિધ ટીમો બનાવી શોધખોળ શરૂ કરી છે. સમગ્ર કૌભાંડ પાછળ અન્ય કોઈ લોકો સંડોવાયેલા છે કે નહીં તે દિશામાં પણ તપાસ ચાલી રહી છે.
પશ્ચિમ કચ્છ LCB દ્વારા હાથ ધરાયેલી આ કાર્યવાહીથી વિસ્તારમાં ચકચાર મચી ગઈ છે. પોલીસે ગુનો નોંધી વધુ તપાસ હાથ ધરી છે અને આગામી દિવસોમાં વધુ ખુલાસા થવાની શક્યતા વ્યક્ત કરવામાં આવી રહી છે.
