ભાવનગર: ભાવનગર લોકલ ક્રાઇમ બ્રાન્ચ (LCB)એ શહેરમાં ઘરફોડ ચોરીની ઘટનાઓ સામે મોટી કાર્યવાહી હાથ ધરી પાંચ રીઢા શખ્સોને ઝડપી પાડ્યા છે. પોલીસે તેમની પાસેથી સોના-ચાંદીના દાગીના, રોકડ રકમ અને મોબાઇલ ફોન સહિત કુલ રૂ.1,50,711નો મુદ્દામાલ કબજે કર્યો છે.
પોલીસ ઇન્સ્પેક્ટર મયુરધ્વજસિંહ એમ. સરવૈયા અને પી.એસ.આઈ. આર.એ. વાઢેરના માર્ગદર્શન હેઠળ એલસીબીની ટીમ પેટ્રોલિંગમાં હતી. તે દરમિયાન મળેલી ચોક્કસ બાતમીના આધારે રસાલા કેમ્પ વિસ્તાર, ગુરુદ્વારા સામે આવેલા ગધેડિયા ફિલ્ડ પાસે દરોડો પાડવામાં આવ્યો હતો.
કાર્યવાહી દરમિયાન પોલીસે અજય ઉર્ફે તકિયો રાજુભાઈ વાઘેલા (20), નાસીરહુસૈન ઉર્ફે નાગ લીયાકતહુસૈન રફાઈ (21), લક્કી ઉર્ફે બાદશાહ હુસૈનભાઈ ચૌહાણ (19), શાહરૂખ ઉર્ફે બાઠીયો ઉર્ફે ભુરીયો સલીમભાઈ પઠાણ (28) અને **ફારૂક કાળુભાઈ શેખ (31)**ને ઝડપી પાડ્યા હતા.
તપાસ દરમિયાન આરોપીઓ પાસેથી સોના-ચાંદીના દાગીના, રોકડ રકમ અને મોબાઇલ ફોન મળી આવ્યા હતા. પોલીસે જ્યારે આ માલમિલકત અંગે પૂછપરછ કરી ત્યારે આરોપીઓ કોઈ સંતોષકારક જવાબ કે માલિકીના દસ્તાવેજો રજૂ કરી શક્યા નહોતા.
આથી પોલીસે સમગ્ર મુદ્દામાલ કબજે કરીને પાંચેય આરોપીઓ સામે કાયદેસરની કાર્યવાહી હાથ ધરી છે. સાથે જ કબજે કરાયેલા મુદ્દામાલનો સંબંધ અન્ય ઘરફોડ ચોરીના ગુનાઓ સાથે છે કે નહીં તે દિશામાં પણ તપાસ શરૂ કરવામાં આવી છે.
પોલીસ હાલ આરોપીઓના ગુનાહિત ઇતિહાસ, તેમના અન્ય સાગરીતો તથા શહેરમાં નોંધાયેલા અન્ય ઘરફોડ ચોરીના બનાવો સાથેની સંભવિત કડીઓ અંગે વધુ તપાસ કરી રહી છે.
