13 વર્ષ બાદ ઈસ્ટ ઝોનને દુલીપ ટ્રોફી અપાવી : 270 અને 80 રનની ધમાકેદાર ઈનિંગ્સ સાથે ઈશાનનો વિશ્વના ટોચના કેપ્ટનોમાં સમાવેશ
નવી દિલ્હી : ઈશાન કિશનની આગેવાનીમાં ઈસ્ટ ઝોને 13 વર્ષ બાદ દુલીપ ટ્રોફીનું ટાઇટલ જીતીને લાંબા સમયથી ચાલતા દુષ્કાળનો અંત લાવ્યો છે. ઈસ્ટ ઝોન અને સાઉથ ઝોન વચ્ચેની ફાઇનલ મેચ ડ્રોમાં સમાપ્ત થઈ હતી, પરંતુ પ્રથમ ઇનિંગમાં મળેલી લીડના આધારે ઈસ્ટ ઝોનને ચેમ્પિયન જાહેર કરવામાં આવ્યું હતું.
ઈસ્ટ ઝોનની આ જીતમાં કેપ્ટન ઈશાન કિશનનો સૌથી મોટો ફાળો રહ્યો હતો. તેણે પ્રથમ ઇનિંગમાં શાનદાર 270 રનની બેવડી સદી ફટકારી હતી. ત્યારબાદ બીજી ઇનિંગમાં પણ 80 રનની મહત્વપૂર્ણ ઈનિંગ રમી હતી. તેની આ શાનદાર બેટિંગે ટીમને વિશાળ સ્કોર સુધી પહોંચાડવામાં મહત્વની ભૂમિકા ભજવી હતી.
ઈસ્ટ ઝોને ટોસ જીતીને પ્રથમ બેટિંગ કરતાં ઈશાનની બેવડી સદીના સહારે 708 રનનો વિશાળ સ્કોર ઊભો કર્યો હતો. તેના જવાબમાં સાઉથ ઝોનની ટીમ પ્રથમ ઇનિંગમાં માત્ર 336 રનમાં ઓલઆઉટ થઈ ગઈ હતી. આ રીતે ઈસ્ટ ઝોનને પ્રથમ ઇનિંગમાં 372 રનની વિશાળ લીડ મળી હતી.
ઈસ્ટ ઝોને ફોલો-ઓન આપવાને બદલે ફરી બેટિંગ કરવાનો નિર્ણય લીધો હતો. બીજી ઇનિંગમાં ટીમે સાત વિકેટે 388 રન બનાવ્યા હતા. મેચ ડ્રોમાં સમાપ્ત થતાં પ્રથમ ઇનિંગની લીડ ઈસ્ટ ઝોન માટે નિર્ણાયક સાબિત થઈ અને ટીમે દુલીપ ટ્રોફી પોતાના નામે કરી હતી.
કેપ્ટન તરીકે 16 મેચથી હાર્યો નથી
દુલીપ ટ્રોફીની જીત સાથે ઈશાન કિશને ફર્સ્ટ-ક્લાસ ક્રિકેટમાં કેપ્ટન તરીકે પોતાનો અણનમ સિલસિલો વધુ મજબૂત કર્યો છે. કેપ્ટન તરીકે તેની ટીમ હવે સતત 16 ફર્સ્ટ-ક્લાસ મેચમાં અણનમ રહી છે. આ દરમિયાન ટીમે 8 મેચ જીતી છે અને 8 મેચ ડ્રો કરી છે, જ્યારે એક પણ મેચમાં પરાજય થયો નથી.
આ રેકોર્ડ સાથે ઈશાન કિશને ફર્સ્ટ-ક્લાસ ક્રિકેટના ઈતિહાસમાં કેપ્ટન તરીકે સૌથી લાંબા અણનમ સિલસિલાની યાદીમાં સંયુક્ત રીતે આઠમું સ્થાન મેળવ્યું છે.
શ્રીલંકાના મહિન્દા હાલંગોડા ટોચ પર
કેપ્ટન તરીકે સૌથી લાંબા અણનમ ફર્સ્ટ-ક્લાસ સિલસિલાના રેકોર્ડમાં શ્રીલંકાના મહિન્દા હાલંગોડા ટોચ પર છે. તેમની કેપ્ટનશીપ હેઠળ ટીમ 1989થી 1993 વચ્ચે સતત 30 ફર્સ્ટ-ક્લાસ મેચમાં અણનમ રહી હતી.
ઈશાન કિશનનો 16 મેચનો અણનમ સિલસિલો હવે ફર્સ્ટ-ક્લાસ ક્રિકેટના ઐતિહાસિક રેકોર્ડમાં નોંધાઈ ગયો છે. દુલીપ ટ્રોફીની જીત અને વ્યક્તિગત રેકોર્ડ સાથે ઈશાન માટે આ ટુર્નામેન્ટ યાદગાર બની રહ્યું છે.
