ઇરાને અમેરિકી હિતોને નિશાન બનાવ્યાનો દાવો; અમેરિકાએ ઇરાનના સૈન્ય ઠેકાણાઓ પર વધુ હુમલા તેજ કર્યા
તેહરાન/વોશિંગ્ટન: મધ્યપૂર્વમાં અમેરિકા અને ઇરાન વચ્ચેનો સૈન્ય સંઘર્ષ વધુ ઉગ્ર બનતો જઈ રહ્યો છે. ઇરાને હોર્મુઝની સામુદ્રધુનીમાં બે તેલ ટેન્કરો પર હુમલો કર્યો હોવાનો દાવો કરવામાં આવ્યો છે, જેના પગલે બંને જહાજોમાં આગ ભભૂકી ઊઠી હતી. બીજી તરફ અમેરિકા દ્વારા ઇરાનના વિવિધ સૈન્ય લક્ષ્યો પર વધુ હુમલાઓ કરવામાં આવ્યા હોવાનું અહેવાલોમાં જણાવાયું છે.
ઇરાનના રિવોલ્યુશનરી ગાર્ડ્સે બહેરીનમાં આવેલી અમેરિકી રડાર અને એર ડિફેન્સ સિસ્ટમને નિશાન બનાવ્યાનો દાવો કર્યો છે. ઉપરાંત કુવૈતમાં અમેરિકી સૈન્ય સાધનોને નુકસાન પહોંચાડવાનો પણ દાવો કરવામાં આવ્યો છે. જોકે, આ દાવાઓની સ્વતંત્ર પુષ્ટિ થઈ નથી.
ઇરાનના રાષ્ટ્રપતિ મસૂદ પેઝેશ્કિયાને જણાવ્યું કે દેશ દરેક પરિસ્થિતિનો સામનો કરવા તૈયાર છે અને વિદેશી હુમલાનો જવાબ આપવામાં આવશે. તેમણે ઇરાનના વ્યૂહાત્મક વિસ્તારોને નિશાન બનાવવાના પ્રયાસો સામે કડક ચેતવણી પણ આપી હતી.
બીજી તરફ અમેરિકાએ સતત દસમા દિવસે ઇરાનના સૈન્ય મથકો, ડ્રોન લોન્ચ સાઇટ્સ અને એર ડિફેન્સ સિસ્ટમોને નિશાન બનાવી હુમલાઓ ચાલુ રાખ્યા હોવાનું જણાવ્યું છે. અહેવાલો મુજબ ચાબહાર બંદર વિસ્તાર સહિત કોનારક, બંદર અબ્બાસ, બુશેહર અને કેશમ આઇલેન્ડ નજીક પણ વિસ્ફોટોના અહેવાલ સામે આવ્યા છે.
અમેરિકી સેન્ટ્રલ કમાન્ડે જણાવ્યું છે કે આ કાર્યવાહીનો હેતુ ઇરાનની સૈન્ય ક્ષમતાને નબળી પાડવાનો છે. બીજી તરફ ઇરાનનો આરોપ છે કે અમેરિકા તેના વ્યૂહાત્મક માળખાને નિશાન બનાવી રહ્યું છે.
તાજેતરના હુમલાઓ બાદ હોર્મુઝની સામુદ્રધુની અને સમગ્ર મધ્યપૂર્વમાં તણાવ વધુ વધી ગયો છે. આંતરરાષ્ટ્રીય સ્તરે સ્થિતિ પર નજીકથી નજર રાખવામાં આવી રહી છે અને સંઘર્ષ વધુ વિસ્તરે તેવી આશંકા વ્યક્ત કરવામાં આવી રહી છે.
