ભારત-ચીન સહિતના દેશો સામે ટ્રમ્પને મોટી સત્તા, અમેરિકી સેનેટમાં ખરડો મંજૂર
વોશિંગ્ટન: રશિયા પાસેથી ક્રૂડ ઓઈલ અને ગેસ ખરીદનારા દેશો પર 100% સુધીનો ટેરિફ લાદવાની સત્તા અમેરિકી રાષ્ટ્રપતિ ડોનાલ્ડ ટ્રમ્પને આપતા ખરડાને અમેરિકી સેનેટે મંજૂરી આપી છે.
ખરડો 86 વિરુદ્ધ 11 મતથી પસાર થયો છે. હવે તેને હાઉસ ઓફ રિપ્રેઝન્ટેટિવ્સની મંજૂરી માટે મોકલવામાં આવશે.
અમેરિકાનું કહેવું છે કે રશિયાને ક્રૂડ અને ગેસના વેચાણથી મળતી આવક યુક્રેન સામેના યુદ્ધને આર્થિક ટેકો આપે છે. તેથી રશિયન ઊર્જા ખરીદનારા દેશો પર દબાણ વધારવાનો નિર્ણય લેવાયો છે.
છેલ્લા કેટલાક વર્ષોમાં ભારત રશિયાના મોટા ક્રૂડ ઓઈલ ખરીદદારોમાં સામેલ રહ્યું છે. તેથી આ ખરડો કાયદો બનશે તો ભારતના ઊર્જા વેપાર અને અમેરિકા સાથેના સંબંધો પર તેની અસર પડી શકે છે.
ખરડામાં રશિયાના વ્લાદિમીર પુતિન, અબજોપતિઓ અને નાણાકીય સંસ્થાઓ સામે વધુ પ્રતિબંધોની જોગવાઈ પણ છે. રશિયા સામેના કેટલાક હાલના પ્રતિબંધોને 2031 સુધી લંબાવવાની જોગવાઈ કરવામાં આવી છે.
આ પગલાથી ભારત સહિતના દેશો માટે રશિયા સાથે ઊર્જા વેપાર અને અમેરિકા સાથેના વેપાર વચ્ચે સંતુલન જાળવવાનો પડકાર વધી શકે છે.
