ઝાંસીમાં હાઇવે પર બેકાબૂ કાર ડિવાઇડર સાથે અથડાઈ; બેના મોત, ત્રણ લોકો ગંભીર રીતે ઘાયલ
ઝાંસી: ઉત્તર પ્રદેશના ઝાંસી જિલ્લામાં થયેલા એક ભયાનક માર્ગ અકસ્માતમાં માફિયા ડોન અતિક અહમદના નાના પુત્ર અબાન અહમદનું મોત થયું છે. આ અકસ્માતમાં અબાનના મિત્રનું પણ ઘટનાસ્થળે જ મૃત્યુ થયું છે, જ્યારે અન્ય ત્રણ લોકો ગંભીર રીતે ઈજાગ્રસ્ત થયા છે.
મળતી માહિતી મુજબ, અબાન અહમદ પોતાના સાથીઓ સાથે પ્રયાગરાજથી ઝાંસી તરફ જઈ રહ્યો હતો. તેઓ ઝાંસી જેલમાં બંધ તેના ભાઈ અલી અહમદને મળવા માટે નીકળ્યા હતા.
આ દરમિયાન પૂંછ પોલીસ સ્ટેશન વિસ્તાર હેઠળના નેશનલ હાઇવે પર તેમની કાર અચાનક બેકાબૂ બની હતી અને પૂરપાટ ઝડપે ડિવાઇડર સાથે અથડાઈ હતી. ટક્કર એટલી જોરદાર હતી કે કારનો આગળનો ભાગ સંપૂર્ણ રીતે ક્ષતિગ્રસ્ત થઈ ગયો હતો.
ઘટનાની જાણ થતાં પોલીસ અને રાહત ટીમો તાત્કાલિક સ્થળ પર પહોંચી હતી. ઘાયલોને સારવાર માટે હોસ્પિટલમાં ખસેડવામાં આવ્યા છે.
ઝાંસી પોલીસે અકસ્માતની પુષ્ટિ કરતા જણાવ્યું છે કે ઘટનામાં અબાન અહમદ અને તેના મિત્રનું મોત થયું છે. હાલ પોલીસે સમગ્ર મામલે તપાસ શરૂ કરી છે અને અકસ્માત કેવી રીતે થયો તેની માહિતી એકત્ર કરવામાં આવી રહી છે.
