માયધાર ગામે કાર્યવાહી; 96 દારૂની બોટલ, કાર સહિતનો મુદ્દામાલ જપ્ત, એક સાગરીત ફરાર
પાલીતાણા: પાલીતાણા રૂરલ પોલીસે પ્રોહિબિશન વિરોધી અભિયાન હેઠળ માયધાર ગામમાં દરોડો પાડી ₹2.50 લાખથી વધુનો ભારતીય બનાવટનો વિદેશી દારૂ ઝડપી પાડ્યો છે. પોલીસે એક આરોપીની ધરપકડ કરી દારૂનો જથ્થો, કાર અને મોબાઇલ સહિત કુલ ₹2,50,920નો મુદ્દામાલ કબજે કર્યો છે.
ચોક્કસ બાતમીના આધારે પોલીસે **ચંદુભાઈ લાખાભાઈ ડાભી (રહે. ગરાજીયા, તા. પાલીતાણા)**ને ઝડપી તેની પાસેથી રોયલ ચેલેન્જ ક્લાસિક વ્હિસ્કીની 750 એમએલની 96 બોટલો, અલ્ટો કાર અને મોબાઇલ ફોન જપ્ત કર્યા હતા.
તપાસ દરમિયાન તળાજા તાલુકાના ટીમાણા ગામના અનિલ નામના શખ્સની સંડોવણી પણ સામે આવી છે. જોકે, તે પોલીસ પહોંચે તે પહેલાં જ ફરાર થઈ ગયો હતો. પોલીસે તેને વોન્ટેડ જાહેર કરીને શોધખોળ શરૂ કરી છે.
આ કાર્યવાહી પાલીતાણા રૂરલ પોલીસના પીઆઈ એમ.બી. જાડેજા અને પીએસઆઈ ડી.આર. રાણાના માર્ગદર્શન હેઠળ કરવામાં આવી હતી. પોલીસે બંને આરોપીઓ સામે પ્રોહિબિશન એક્ટ હેઠળ ગુનો નોંધી દારૂના જથ્થાના સ્ત્રોત અને સપ્લાય નેટવર્ક અંગે વધુ તપાસ હાથ ધરી છે.
