બંગાળની ખાડીમાં લો-પ્રેશર વધુ મજબૂત બન્યું, અનેક રાજ્યોમાં ભારે વરસાદનું એલર્ટ
બંગાળની ખાડીમાં સર્જાયેલું લો-પ્રેશર વધુ મજબૂત બની ડીપ ડિપ્રેશનમાં પરિવર્તિત થવાની પ્રક્રિયામાં છે. સિસ્ટમની અસરથી ઓડિશા, આંધ્રપ્રદેશ, તેલંગાણા સહિત પૂર્વ, મધ્ય અને દક્ષિણ ભારતના અનેક રાજ્યોમાં ભારે વરસાદ વરસી રહ્યો છે. હવામાન વિભાગે કેટલાક વિસ્તારોમાં ભારેથી અતિભારે વરસાદ સાથે પૂર અને ભૂસ્ખલનની ચેતવણી પણ જાહેર કરી છે.
ઓડિશામાં સિસ્ટમની સૌથી વધુ અસર જોવા મળી રહી છે. તટીય અને દક્ષિણ ઓડિશાના અનેક વિસ્તારોમાં ધોધમાર વરસાદ વચ્ચે સંભવિત આપત્તિને પહોંચી વળવા 33 રાહત ટીમો તૈનાત કરવામાં આવી છે. રાજ્યમાં કેટલાક વિસ્તારોમાં શૈક્ષણિક કામગીરી બંધ કરવામાં આવી છે અને કર્મચારીઓની રજાઓ પણ રદ કરવામાં આવી છે.
આ સિસ્ટમની અસરથી આંધ્રપ્રદેશ, તેલંગાણા, છત્તીસગઢ, મધ્યપ્રદેશ અને વિદર્ભમાં પણ ભારે વરસાદની આગાહી છે. બિહારમાં ગુરુવાર અને શુક્રવારે કેટલાક વિસ્તારોમાં ભારેથી અતિભારે વરસાદ પડી શકે છે. પૂર્વી ઉત્તરપ્રદેશમાં ગુરુવારથી ગાજવીજ સાથે વરસાદ શરૂ થવાની અને 25-26 સપ્ટેમ્બરે ભારે વરસાદની સંભાવના છે.
બીજી તરફ, ઉત્તરાખંડમાં શુક્રવારથી વરસાદનું જોર વધવાની અને શનિવારે પર્વતીય વિસ્તારોમાં અતિભારે વરસાદની શક્યતા વ્યક્ત કરવામાં આવી છે. હવામાન વિભાગે સિસ્ટમની અસર નેપાળ અને તિબેટ સુધી જોવા મળવાની સંભાવના પણ વ્યક્ત કરી છે.
