નવી દિલ્હી: વડાપ્રધાન નરેન્દ્ર મોદીના જાહેર જીવનમાં મુખ્યમંત્રી અને વડાપ્રધાન તરીકે 25 વર્ષ પૂર્ણ થવાના અવસરે ભાજપ દ્વારા ‘સંકલ્પ સેવા અભિયાન’ શરૂ કરવામાં આવશે. 17 સપ્ટેમ્બરથી વડનગરથી વારાણસી અને વારાણસીથી વડનગર સુધી 10-10 જનસેવા યાત્રાઓ કાઢવાનું આયોજન કરવામાં આવ્યું છે.
આ યાત્રાઓ ગુજરાત, રાજસ્થાન, મધ્ય પ્રદેશ, ઉત્તર પ્રદેશ, છત્તીસગઢ, હરિયાણા અને દિલ્હી સહિત દેશના વિવિધ વિસ્તારોમાંથી પસાર થશે. અત્યાર સુધીમાં 13 રૂટ નક્કી કરવામાં આવ્યા છે, જ્યારે અન્ય રૂટ અંગે ચર્ચા ચાલી રહી છે.
સેવા સાથે જનભાગીદારી પર ભાર
યાત્રાનો હેતુ માત્ર રાજકીય સંપર્ક પૂરતો સીમિત નહીં રહે. તેમાં સ્થાનિક લોકોની ભાગીદારી વધારવા, તેમને સરકારી યોજનાઓ સાથે જોડવા તેમજ વિવિધ સેવા પ્રવૃત્તિઓ અને 2047ના સંકલ્પને પણ સામેલ કરવામાં આવશે.
દરેક પડાવ પર ‘મેરે ભારત કી પ્રગતિ…’ જનવાણી હેઠળ નાગરિકોના અનુભવો અને વાતો રેકોર્ડ કરવામાં આવશે. આ અવાજોને એકત્ર કરીને વારાણસીમાં આશરે 90 મિનિટની ફિલ્મ બનાવવાનો પ્રસ્તાવ છે.
યાત્રાના વિવિધ સ્થળોએ તબીબી શિબિર, સામાન્ય આરોગ્ય તપાસ, બ્લડ પ્રેશર અને શુગર ટેસ્ટનું આયોજન પણ કરવામાં આવશે. સાથે જ સામાન્ય નાગરિકો પાસેથી સૂચનો લેવામાં આવશે.
નારી શક્તિ સંમેલનથી લઈને ક્વિઝ સુધીના કાર્યક્રમો
યાત્રાના મુખ્ય પડાવો પર યુવાનો, મહિલાઓ, વિદ્યાર્થીઓ, લાભાર્થીઓ અને વિવિધ સમુદાયોના લોકોને જોડવામાં આવશે. વિકાસ યાત્રા દરમિયાન સ્થાનિક ભાષામાં શેરી નાટક દ્વારા 2001થી 2026 દરમિયાન એક પરિવારના જીવનમાં વીજળી, ગેસ, આવાસ, શિક્ષણ અને અન્ય સુવિધાઓમાં આવેલા પરિવર્તનો રજૂ કરવામાં આવશે.
આ ઉપરાંત નારી શક્તિ સંમેલન, ક્વિઝ સ્પર્ધા અને સરકારી યોજનાઓના લાભાર્થીઓના સન્માન જેવા કાર્યક્રમો યોજાશે. જ્યાં રાત્રિ રોકાણ હશે ત્યાં 25 દીવડાઓ પ્રગટાવવામાં આવશે. સમગ્ર અભિયાન દરમિયાન આશરે 25 લાખ નાગરિકોની કહાનીઓ બહાર લાવવાનો પ્રસ્તાવ છે.
ભાજપ અધ્યક્ષ નીતિન નબીનનું નિવેદન
ભાજપ અધ્યક્ષ નીતિન નબીને જણાવ્યું કે વડાપ્રધાન મોદીના જાહેર જીવનના 25 વર્ષ દેશની સેવા અને વિકાસને સમર્પિત રહ્યા છે. આ ઉપલબ્ધિને રેખાંકિત કરવા માટે ભાજપ દ્વારા ‘સંકલ્પ સેવા અભિયાન’ અંતર્ગત વિવિધ કાર્યક્રમોનું આયોજન કરવામાં આવશે.
