ચાંગોદરમાં બે ગોડાઉન પર દરોડા, 65 હજારથી વધુ કાર્ટન કબજે; અગ્નિ સુરક્ષાના ગંભીર અભાવનો ખુલાસો
અમદાવાદ: વસ્ત્રાલમાં ગેરકાયદે ફટાકડા ફેક્ટરીમાં થયેલા જીવલેણ વિસ્ફોટ બાદ અમદાવાદ પોલીસે ગેરકાયદે ફટાકડાના સંગ્રહ સામે કડક કાર્યવાહી શરૂ કરી છે. અમદાવાદ ગ્રામ્યની ચાંગોદર પોલીસે મોડાસર ગામ નજીક આવેલા બે ગેરકાયદે ગોડાઉન પર દરોડા પાડી આશરે ₹39.57 કરોડના ફટાકડાનો વિશાળ જથ્થો જપ્ત કર્યો છે.
બાતમીના આધારે હાથ ધરાયેલી કાર્યવાહી દરમિયાન અંબિકા ટ્રેડલિંક નામના બે ગોડાઉનમાં તપાસ કરતાં 65,954 કાર્ટન ફટાકડા મળી આવ્યા હતા. તપાસમાં સામે આવ્યું કે ગોડાઉનમાં મોટી માત્રામાં વિસ્ફોટક સામગ્રી સંગ્રહિત હોવા છતાં પૂરતી અગ્નિ સુરક્ષા વ્યવસ્થા ઉપલબ્ધ નહોતી.
પોલીસના જણાવ્યા મુજબ, ગોડાઉનમાં વોટર સ્પ્રિન્કલર જેવી આવશ્યક સુરક્ષા વ્યવસ્થા નહોતી અને બહારના પતરાના શેડમાં પણ ફટાકડાનો જથ્થો રાખવામાં આવ્યો હતો, જેના કારણે કોઈપણ સમયે મોટી દુર્ઘટના સર્જાઈ શકે તેવી સ્થિતિ હતી.
પોલીસે ગોડાઉનના માલિક અમિતકુમાર મોદી અને મેનેજર કિશન પટેલની ધરપકડ કરીને બંને સામે ગુનો નોંધ્યો છે. જપ્ત કરાયેલા ફટાકડાની કિંમત અંદાજે ₹39.57 કરોડ હોવાનું જણાવાયું છે.
વસ્ત્રાલ બ્લાસ્ટ બાદ હાથ ધરાયેલી આ સૌથી મોટી કાર્યવાહી માનવામાં આવી રહી છે. પોલીસ હવે ગેરકાયદે ફટાકડાના સંગ્રહ અને સપ્લાય સાથે સંકળાયેલા અન્ય સ્થળો અને વ્યક્તિઓ સુધી પહોંચવા તપાસ વધુ તેજ બનાવી રહી છે.
