નવી દિલ્હી: ભારતીય ક્રિકેટના વહીવટમાં મોટા ફેરફારની શક્યતા ઊભી થઈ છે. સુપ્રીમ કોર્ટે BCCI અને તેની સાથે જોડાયેલા રાજ્ય ક્રિકેટ એસોસિએશનોને સવાલ કર્યો છે કે તેમને નેશનલ સ્પોર્ટ્સ ગવર્નન્સ એક્ટ, 2025ના દાયરામાં કેમ લાવવામાં ન આવે. કોર્ટે આ અંગે BCCI અને સંબંધિત સંસ્થાઓને પોતાનો પક્ષ રજૂ કરવા કહ્યું છે.
છેલ્લા ઘણા વર્ષોથી ક્રિકેટ સંસ્થાઓના વહીવટ, ચૂંટણી, સત્તાની ખેંચતાણ અને બંધારણીય જોગવાઈઓને લઈને વિવિધ વિવાદો સુપ્રીમ કોર્ટ સુધી પહોંચતા રહ્યા છે. હવે કોર્ટના આ સવાલથી BCCI અને રાજ્ય ક્રિકેટ એસોસિએશનોની કામગીરી માટે નવા નિયમોની શક્યતા વધી છે.
પારદર્શિતા અને વહીવટમાં થઈ શકે ફેરફાર
જો BCCI અને રાજ્ય ક્રિકેટ સંસ્થાઓ નવા કાયદાના દાયરામાં આવે છે, તો તેમની ચૂંટણી પ્રક્રિયા, વહીવટી માળખું, જવાબદારી અને પારદર્શિતા અંગેના નિયમોમાં મહત્વપૂર્ણ ફેરફાર થઈ શકે છે. નેશનલ સ્પોર્ટ્સ ગવર્નન્સ એક્ટનો હેતુ રમતગમતની સંસ્થાઓમાં સુશાસન, નૈતિકતા, પારદર્શિતા અને વિવાદોના નિરાકરણ માટે એક નિયમિત માળખું ઊભું કરવાનો છે.
BCCI અગાઉ શું કહી ચૂક્યું છે?
આ મુદ્દે અગાઉ BCCIએ એક કેસમાં દલીલ કરી હતી કે ક્રિકેટને હજુ ‘designated sport’ તરીકે નોટિફાઈ કરવામાં આવ્યું નથી, તેથી નેશનલ સ્પોર્ટ્સ ગવર્નન્સ એક્ટ તેની ઉપર લાગુ પડતો નથી. હવે સુપ્રીમ કોર્ટ દ્વારા આ મુદ્દે સીધો જવાબ માંગવામાં આવતા BCCI અને રાજ્ય એસોસિએશનોની સ્થિતિ મહત્વપૂર્ણ બની છે.
સુપ્રીમ કોર્ટના આ પગલાને ભારતીય ક્રિકેટના વહીવટમાં લાંબા સમયથી ચાલી રહેલા સુધારાના પ્રયાસોમાં મહત્વપૂર્ણ વિકાસ તરીકે જોવામાં આવી રહ્યો છે. જોકે, કાયદો BCCI પર કઈ રીતે અને કયા તબક્કે લાગુ પડશે તે અંગેનો અંતિમ નિર્ણય આગળની સુનાવણી બાદ સ્પષ્ટ થશે.
